೨೨೬
ಕದಳಿಯ ಕರ್ಪೂರ
ಭಾವಶುದ್ಧವಿಲ್ಲದವರಲ್ಲಿ ಆರತಿಯನೊಲ್ಲೆಯಯ್ಯಾ ನೀನು.
ಪರಿಣಾಮಿಗಳಲ್ಲದವರಲ್ಲಿ ನೈವೇದ್ಯವನೊಲ್ಲೆಯಯ್ಯಾ ನೀನು.
ಹೃದಯಕಮಲ ಶುದ್ಧವಿಲ್ಲದವರಲ್ಲಿ ಇರಲೊಲ್ಲೆಯಯ್ಯಾ ನೀನು.
ಎನ್ನಲ್ಲಿ ಏನುಂಟೆಂದು ಕರಸ್ಥಲವನಿಂಬುಗೊಂಡೆ
ಹೇಳಾ ಚೆನ್ನಮಲ್ಲಿಕಾರ್ಜುನಾ !
ತನಗೇ ಅನ್ವಯಿಸಿಕೊಂಡು ಹೇಳಿದ ಆ ಮಾತು ಶರಣರೆಲ್ಲವನ್ನೂ ಆತ್ಮ ಶೋಧನೆಗೆ ಹಚ್ಚಿತ್ತು. ಅನುಭವಮಂಟಪವೆಲ್ಲಾ ಸ್ತಬ್ಧವಾಗಿ ಆ ವಚನತೀರ್ಥದ ಮಹತ್ತಿನಲ್ಲಿ ಮಿಂದಿತ್ತು.
ಈ ಲೋಕದಲ್ಲಿ ಇದ್ದರೂ ಇದಕ್ಕೆ ಅಂಟದಂತೆ ಬಾಳಬೇಕೆಂಬ ಮಾತನ್ನು ಪ್ರತಿಪಾದಿಸುವ ಸಂದರ್ಭದಲ್ಲಿ, ಇನ್ನೊಂದು ದಿನ ಮಹಾದೇವಿ ಹೇಳಿದ ವಚನವಂತೂ ಶರಣರ ಮನಸ್ಸನ್ನು ಸೂರೆಗೊಂಡಿತ್ತು :
ಹಾವಿನ ಹಲ್ಲ ಕಳೆದು ಹಾವನಾಡಿಸಬಲ್ಲರೆ
ಹಾವಿನಸಂಗವೇ ಲೇಸು ಕಂಡಯ್ಯ.
ಕಾಯ ಸಂಗವ ವಿವರಿಸಬಲ್ಲರೆ,
ಕಾಯ ಸಂಗವೇ ಲೇಸು ಕಂಡಯ್ಯ ;
ತಾಯ ರಕ್ಕಸಿಯಾದಂತೆ ಕಾಯವಿಕಾರವು.
ಚೆನ್ನಮಲ್ಲಿಕಾರ್ಜುನಯ್ಯ ನೀನೊಲಿದವರು
ಕಾಯಗೊಂಡಿರ್ದರೆನಬೇಡ.
ಇದನ್ನು ಕೇಳಿದ ಚೆನ್ನಬಸವಣ್ಣ ತನ್ನ ಮೆಚ್ಚುಗೆಯನ್ನು ಅಡಗಿಸಿಕೊಳ್ಳಲಾರದೆ ಮೇಲೆದ್ದು,
ಅಕ್ಕನ ವಚನಗಳ ಶಕ್ತಿಯನ್ನು ತುಂಬುಹೃದಯದಿಂದ ಕೊಂಡಾಡುತ್ತಾ ಹೀಗೆ ಹೇಳಿದ್ದ :
ಆದ್ಯರ ಅರವತ್ತು ವಚನಕ್ಕೆ ದಣ್ಣಾಯಕರ ಇಪ್ಪತ್ತು ವಚನ ;
ದಣ್ಣಾಯಕರ ಇಪ್ಪತ್ತು ವಚನಕ್ಕೆ ಅಜಗಣ್ಣನ ಹತ್ತು ವಚನ ;
ಪ್ರಭುದೇವರ ಹತ್ತು ವಚನಕ್ಕೆ ಅಜಗಣ್ಣನ ಐದು ವಚನ ;
ಅಜಗಣ್ಣನ ಐದು ವಚನಕ್ಕೆ ಕೂಡಲಚನ್ನ ಸಂಗಯ್ಯನಲ್ಲಿ
ಮಹಾದೇವಿಯಕ್ಕಗಳ ಒಂದು ವಚನ
ನಿರ್ವಚನ ಕಾಣಾ, ಸಿದ್ಧರಾಮಯ್ಯ.
ಶರಣರೆಲ್ಲರೂ ಇದಕ್ಕೆ ಒಪ್ಪಿಗೆಯ ಉದ್ಗಾರವನ್ನು ಘೋಷಿಸಿದ್ದರು. ಆಕೆ ತಮ್ಮೆಲ್ಲರ ಅಕ್ಕ,
ಎಂದು ಮೆಚ್ಚಿ ನುಡಿದಿದ್ದರು. ವಿನಮ್ರಳಾಗಿ ಅಕ್ಕ ತಲೆಬಾಗಿದ್ದಳು.
