ಪುಟ:ಮಿಂಚು.pdf/೨೩೪

228⁠⁠⁠⁠⁠⁠⁠⁠⁠⁠⁠ ಮಿಂಚು
⁠“ಆಯ್ತು, ಮಾತಾಜಿ."
⁠........ಹನ್ನೆರಡು ಆಗುತ್ತಿದ್ದಂತೆ ದಿಲ್ಲಿಯ ಕಿಂಧಾ ಸಂಪರ್ಕಾಧಿಕಾರಿ
ಫರ್ನಾಂಡೀಸ್‌ನ ಕರೆ ಬಂತು,
⁠ಮಾರ್ದವತೆ ತುಂಬಿದ ಧ್ವನಿಯಲ್ಲಿ ಸೌದಾಮಿನಿ ಅಂದಳು :
⁠“ಹಲೋ ಸಂಪರ್ಕಾಧಿಕಾರಿ ಫೆರ್ನಾಂಡೀಸ್ ! ನಮ್ಮ ಸ್ಪೀಕರ್‌ ಮತ್ತು ಶಾಸಕ
ಏನ್ಮಾಡ್ತಿದಾರೆ ?”
⁠“ಕುಟೀರಕ್ಕೆ ಬರಲಿಲ್ಲ. ನಕುಲದೇವ್‌ಜಿ ಅವರನ್ನು ಕರಕೊಂಡು ಪ್ರಧಾನಿ
ಯವರನ್ನು ಕಾಡ್ತಾರೆ ಅಂತ 'ಹಿಂದೂಸ್ಥಾನ್ ಹೆರಾಲ್ಡ್' ಮಿತ್ರನಿಂದ ತಿಳೀತು”
⁠“ನಮ್ಮ ಇಬ್ಬರು ಪತ್ರಿಕಾಗೋಷ್ಠಿ ಕರೆಯೋದಿಲ್ಲ ?”
⁠“ಇಷ್ಟರವರೆಗೆ ಅದರ ಸುದ್ದಿ ಇಲ್ಲ.”
⁠“ಸಂಜೆ ಅಲ್ಲಿಂದ ಯಾರು ಯಾರು ಹೊರಡ್ತಾರೇಂತ ತಿಳಕೊಂಡು ಫೋನ್
ಮಾಡಿ. ವಿಮಾನ ನಿಲ್ದಾಣಕ್ಕೆ ಹೋಗಿ ನಮಸ್ಕಾರ ಮಾಡಿದರೂ ತಪ್ಪಿಲ್ಲ.”
⁠“ನನಗೆ ವಿಶ್ವಂಭರರ ಪರಿಚಯ ಇಲ್ಲ.”
⁠“ನಕುಲದೇವ್‌ಜಿಗೆ ಸಲಾಂ ಹೊಡೀರಿ."
⁠“ಆಗಲಿ, ಮಾತಾಜಿ, ನಿಲ್ದಾಣದಿಂದ ವಾಪಸು ಬಂದು ಫೋನ್ ಮಾಡ್ತೀನಿ.”
⁠“ಹೂಂ, ಗೃಹ ಕಾರಾಲಯದಲ್ಲೇ ಇದ್ದೇವೆ.”
⁠ಚೌಗುಲೆಯವರ ದೂತ ಪರಶುರಾಮನಿಗೆ ಆಜ್ಞಾಪತ್ರ ತಂದ. ಅಂಟಿಸಿದ
ಲಕೋಟೆ, ಸೌದಾಮಿನಿ ತೆರೆದು ಓದಿದಳು. ಮುಖ ಅಗಲಿಸಿ, ಆಪ್ತ ಕಾರ್ಯದರ್ಶಿಗೆ
ಅಂದಳು :
⁠“ತಗೋ. ಲಕೋಟೆ, ಕಾಗದ ಎರಡೂ.”
⁠ಕೊಠಡಿಯಿಂದ ಹೊರಬಿದ್ದು ಒಬ್ಬನೇ ಮೂಲೆಯಲ್ಲಿ ನಿಂತು ಆಜ್ಞಾಪತ್ರ
ವನ್ನು ಓದಿದ, ಇನ್ನು ಪರಶುರಾಮ ವಾರ್ತಾ ಇಲಾಖೆಯ ಜಂಟಿ ನಿರ್ದೇಶಕ.
ನಂಬಲಾರ, ಮಾತಾಜಿ ಸಾಧಿಸಿದ ಪವಾಡ,
⁠ವಾರ್ತಾ ಇಲಾಖೆಯ ನಿರ್ದೇಶಕನಿಂದ ಫೋನ್ ಬಂತು :
⁠“ಹಿಂದೆ ಒಮ್ಮೆ ನಾನು ಹೇಳಿದ್ದು ನೆನಪಿದೆಯ ಮಿ. ಪರಶುರಾಮ್ ?”
⁠“ಹೌದಲ್ಲ ? ನೀವು ತಮಾಷೆಗೆ ಹೇಳಿದ್ದಿರಿ.”
⁠“ಈಗ ನಿಜವಾಗಿದೆ.”
⁠“ಏನಿದ್ದರೂ ನಾನು ಇಲ್ಲೇ ಇದ್ದೀನಿ.”
⁠“ಅದ್ದರಿ. ಯಾವಾಗಲಾದರೂ ಬೇಸರ ಅನಿಸಿದಾಗ, ಅಥವಾ ಎತ್ತಂಗಡಿ
ಆದಾಗ ನೀವು ಇಲ್ಲಿಗೆ ಬಂದೇ ಬರೀರಿ, ಜೋಡಿ ಕತ್ತೆ ದುಡಿತ ಚೆನ್ನಾಗಿದೆ.”
⁠“ಏನೋಪ್ಪ.”
⁠ಸ್ವರತಗ್ಗಿಸಿ ಆ ಕಡೆಯಿಂದ ನಿರ್ದೇಶಕ ಕೇಳಿದ :