ಆಹ್ವಾನ
ಉತ್ತರದವನು :
ದಕ್ಷಿಣದವರು ತುಚ್ಛ ಜನ !! ರಾಜಧಾನಿಗೆ ಬಂದು ಮುಖ್ಯ ಸ್ಥಳಗಳನ್ನೆಲ್ಲಾ ಆಕ್ರಮಿಸಿದ್ದಾರೆ! ಆಶ್ರಯ ಕೊಡಬಾರದು ಅವರಿಗೆ !
ನಿರೂಪಕ :
ಕಲಕು ನೀರಿನ ಈ ಮಹಾಪ್ರವಾಹದಲ್ಲಿ ಅಂತರ್ಗತವಾಗಿರುವ ಇನ್ನೊಂದು ಪ್ರವಾಹವುಂಟು, ಮೇರೆಮೀರಿದ ಭಾಷಾ ವ್ಯಾಮೋಹ, ಅಥವಾ, ಇತಿಹಾಸಜ್ಞ ಟಾಯ್'ನ ಬೀ ಹೇಳಿರುವಂತೆ, 'ಭಾಷಾವಾರು ರಾಷ್ಟ್ರೀಯವಾದ'. ಸಾಧುವಾದುದಲ್ಲ, ಪ್ರಾಗತಿಕ ಉದ್ದೇಶ ಉಳ್ಳದಲ್ಲ. ಹುಟ್ಟುಕುರುಡು. ಒಂದು ಗೆರೆಯಾಚೆಗಿನ ಈಚೆಗಿನ ಚೂರು ಪಾರು ನಮ್ಮದೇ ನೆಲಕ್ಕಾಗಿ ಎಂತಹ ಆಕ್ರೋಶ ! ತೂಕತಪ್ಪಿದ ನುಡಿ, ತಾಳತಪ್ಪಿದ ನಡತೆ, ಸಿಟ್ಟಿನ ಕೈಯ್ಯಲ್ಲಿ ಬುದ್ಧಿಯ ಜುಟ್ಟುಕೊಟ್ಟು, ಕಳೆದುಹೋದ ಸೂಜಿಗಾಗಿ ಕಗ್ಗತ್ತಲಲ್ಲಿ ಪರದಾಟ, ಕಾದಾಟ. ನಾಲ್ಕು ಪ್ರಾಂತಗಳ ನಾಲ್ಕು ಜನ ಸೇರಿದ ಕಡೆ, ಪರಸ್ಪರ ಭಾಷೆಗಳನ್ನು ಕುರಿತ ಮೂದಲಿಕೆಯೇ ದಿನನಿತ್ಯದ ಕ್ರೂರ ವಿನೋದ. ದೇಶವನ್ನು ವಿಭಜಿಸಿದ ಕತ್ತಿ ಇನ್ನೂ ಪೂರ್ತಿ ಮೊಂಡಾಗಿಲ್ಲ, ಮ್ಯೂಸಿಯಮಿನ ಕೌತುಕದ ವಸ್ತುಗಳ ನಡುವೆ ಅದಕ್ಕಿನ್ನೂ ಸ್ಥಾನ ದೊರೆತಿಲ್ಲ. ಆ ಕತ್ತಿಯನ್ನು ಮತ್ತೂ ಮಸೆಯಬೇಕು, ಇನ್ನೂ ಬಳಸಬೇಕು-ಎನ್ನುವ ಆಸೆ ಕೆಲವರಿಗೆ.
ಪುರುಷ ಪತ್ರಿಕೋದ್ಯೋಗಿ :
ಸ್ವಲ್ಪ ಸಮಯದ ಹಿಂದೆ ದೇಶದೊಂದು ರಾಜ್ಯದಲ್ಲಿ ಭಾಷಾ ಗಲಭೆಗಳಾದುವಷ್ಟೆ? ಅಲ್ಲಿಗೆ ಹೋಗಿ ಆ ವಿಷಯವಾಗಿ ವರದಿ ಮಾಡಲು ನನ್ನ ಪತ್ರಿಕೆ ನನ್ನನ್ನು ಕಳಿಸಿಕೊಟ್ಟಿತು. [ಹೃದಯವನ್ನು ತೋಡಿಕೊಳ್ಳುತ್ತ] ಅಲ್ಲಿ ಕಂಡು ಕೇಳಿದ ಸಂಗತಿಗಳಿಂದೆ ನಾನು ಅಧೀರನಾಗಿ ಹೋದೆ. ನನ್ನ ಮನಸ್ಸಿನ ಮೇಲಾದ ಅಪಘಾತದಿಂದ ಚೇತರಿಸಿಕೊಳ್ಳಲಾರದಾದೆ. ನಡದುದರ ನೂರರಲ್ಲೊಂದು ಪಾಲು ವರದಿಮಾಡಿದರೂ ಆ ಬರೆವಣಿಗೆ ಓದಲು ಅರ್ಹವಾಗದೆನಿಸಿತು.ಯಾರದೋ ಜಗಳ -ಸತ್ತವರು ಯಾರೋ!ಸಾವಿನ ರೀತಿಯಾದರೂ ಎಷ್ಟು ಹೃದಯವಿದ್ರಾವಕ !ಎಷ್ಟು ಹೇಯ!ಆವರೆಗೆ ನಾನೊಬ್ಬ
——
೭೦
