ಪ್ರಭು ಆಶ್ಚರ್ಯಗೊಂಡ ಅವಳ ಉತ್ತರದಿಂದ. ಆದರೆ ಅದನ್ನು ತೋರ್ಪಡಿಸದೆ ಮತ್ತೆ ಹೇಳಿದ:
``ಅದು ಹೋಗಲಿ, ಅರಿಷಡ್ವರ್ಗಗಳಿಂದಲೇ ನಿರ್ಮಿತವಾದ ಈ ದೇಹದಲ್ಲಿದ್ದು ಅವುಗಳನ್ನು ದಾಟಿದ್ದೇನೆಂದರೆ ಅದನ್ನು ನಂಬುವುದು ಹೇಗೆ?
ಕಾಮದಿಂದ ಕಂಡ, ಕ್ರೋಧದಿಂದ ಆಸ್ಥಿ,
ಲೋಭದಿಂದ ಸಕಲ ವಿಷಯಗಳು ;
ಮೋಹದಿಂದ ಓಡಿಹೆನೆಂಬುದೆಲ್ಲವು ಕಾಮನ ಬಲೆಯೊಳಗು
ಕಾಮನ ಗೆದ್ದ ತಾವಾವುದು ಹೇಳಾ,
ಗುಹೇಶ್ವರಲಿಂಗಕ್ಕೆ ?
ಉಜ್ಜಿದಷ್ಟೂ ಕಾಂತಿಯನ್ನು ಕೊಡುವ ಅಪರಂಜಿಯಂತೆ ಮಹಾದೇವಿಯ ಮುಖ ಮಿಂಚಿತು ಪ್ರಭುವಿನ ಈ ಮಾತನ್ನು ಕೇಳಿ ಹೇಳಿದಳು :
``ಕಾಮವನ್ನು ಗೆದ್ದ ಠಾವನ್ನು ಹೇಳಬೇಕೇ, ಪ್ರಭುವೇ ಇಲ್ಲ... ಇನ್ನೂ ಮುಂದುವರಿದು ಹೇಳುತ್ತೇನೆ ; ಕಾಮನನ್ನು ಗೆಲ್ಲುವುದಕ್ಕೆ ಆ ಕಾಮ, ನನ್ನ ಮನಸ್ಸಿನಲ್ಲಿ ಎಂದೂ ಹುಟ್ಟಿಯೇ ಇಲ್ಲ, ಕೇಳಿರಿ :
ಅಂಗದ ಭಂಗವ ಲಿಂಗಸುಖದಿಂದ ಗೆಲಿದೆ,
ಮನದ ಭಂಗವ ಅರುಹಿನ ಮುಖದಿಂದ ಗೆಲಿದೆ
ಜೀವದ ಭಂಗವ ಶಿವಾನುಭವದಿಂದ ಗೆಲಿದೆ,
ಕರಣದ ಕತ್ತಲೆಯ ಬೆಳಗನುಟ್ಟು ಗೆಲಿದೆ,
ಜವ್ವನದ ಹೊರಮಿಂಚಿನಲ್ಲಿ ನಿಮ್ಮ ಕಣ್ಣಿಂಗೆ ತೋರುವ ಕಾಮನ
ಸುಟ್ಟುರುಹಿದ ಭಸ್ಮವ ನೋಡಯ್ಯ ?
ಚೆನ್ನಮಲ್ಲಿಕಾರ್ಜುನ, ಕಾಮನ ಕೊಂದು ಮನಸಿಜನಾಗುಳುಹಿದರೆ,
ಮನಸಿಜನ ತಲೆಯ ಬರೆಹವ ತೊಡೆದನು.
``ನನ್ನ ಪತಿ ಚೆನ್ನಮಲ್ಲಿಕಾರ್ಜುನ, ಕಾಮನನ್ನು ಕೊಂದು ಮತ್ತೆ ಅವನನ್ನು ಬದುಕಿಸಿ ಮನಸಿಜನನ್ನಾಗಿ ಮಾಡಿದ `ನೆನೆಯುವವರ ಮನದಲ್ಲಿ ಹುಟ್ಟು' ಎಂದು ಅವನ ಹಣೆಯ ಬರಹವ ಬರೆದ. ಆದರೆ ನಾನು ಮನಸಿಜನ ಆ ತಲೆಯ ಬರಹವನ್ನೇ ತೊಡೆದುಹಾಕಿದ್ದೇನೆ. ನನ್ನ ಮನಸ್ಸು ಎಂದೂ ಮನಸಿಜನ ಜನನಕ್ಕೆ ಅವಕಾಶವನ್ನೇ ಕೊಟ್ಟಿಲ್ಲ. ನಿಮ್ಮಂತಹ ಕೆಲವರು ಮಾತ್ರ ಇದನ್ನು ಅರ್ಥಮಾಡಿಕೊಳ್ಳಬಲ್ಲಿರಿ - ಎಂದು ಇಂದು ನಿಮ್ಮ ಮುಂದೆ ಇದನ್ನು ಇಡುತ್ತಿದ್ದೇನೆ.
