ಈ ಪುಟವನ್ನು ಪರಿಶೀಲಿಸಲಾಗಿದೆ
ಶತಮಾನ] ಚಾಟುವಿಠಲನಾಧ. 223
ಸದಮಳಾಚ್ಯುತಕೃಷ್ಣರಾಯನ | ಹೃದಯವೆನಿಸುವ ಭಾಗವತಶಾ |
ಸ್ತ್ರದ ಮಹಾಸತ್ಕೀರ್ತಿಲಕ್ಷ್ಮಿಯ ವಿಜಯಮಂದಿರವ ||
ತುದಿಯ ಕಲಶಸ್ಥಾನವೆನಲೊ | ಪ್ಪಿದನು ಪಾಲಿಸುತೊಲಿದು ತನ್ನಯ |
ಪದವಿತೊಲುಮೆಯೊಳಚ್ಯುತಾರಣ್ಯಾಖ್ಯಯತಿರಾಯ ||
ನಿರುಪಮಾಚ್ಯುತಕೃಷ್ಣರಾಯನ | ಪರಮತೇಜಃಪುಂಜವೇ ಜೇ |
ತರಿಸಿ ಗುರುರೂಪಾಗಿ ಭಾಗವತಾಂತರಂಗವನು ||
ಧರೆಗೆ ಕನ್ನಡವಾಗಿ ತೆಗೆದು | ದ್ದರಿಸಿ ಕಡೆಗಾಣಿಸಿದನತ್ಯಾ |
ಶ್ಚರಿಯವೆನಲು ಸದಾಚ್ಯುತಾರಣ್ಯಾಖ್ಯ ಯತಿರಾಯ ||
ಕುಮಾರವ್ಯಾಸನ ಭಾರತದಲ್ಲಿ ಸೂಕ್ಷ್ಮವಾಗಿ ಹೇಳಿರುವ ಕೆಲವು ಅಂಶಗಳನ್ನು ಈತನು ಆಸ್ತೀಕ ಮೌಲೋಮಪರ್ವಗಳಾಗಿ ವಿಸ್ತರಿಸಿ ಬರೆದಿರುವುದರಿಂದ ಅವನ ಕಾಲಕ್ಕಿಂತ (ಸು. 1430) ಈಚೆಯವನು ಎಂದು ತಿಳಿಯಬಹುದಾಗಿದೆ. ಅಲ್ಲದೆ ಮೇಲಣ ಪದ್ಯಗಳಿಂದ ಈ ಕವಿ ವಿಜಯ ನಗರದ (ವಿಜಯಮಂದಿರ) ಕೃಷ್ಣರಾಯ (1509-1529), ಅಚ್ಯುತರಾಯ (1530-1542) ಇವರುಗಳ ಕಾಲದಲ್ಲಿ ಭಾಗವತವನ್ನು ಬರೆದಿರಬಹುದು ಎಂದು ಊಹಿಸಲು ಅವಕಾಶವಿದೆ. ಈ ಊಹೆಯ ಪ್ರಕಾರ ಕವಿಯ ಕಾಲವು ಸುಮಾರು 1530 ಆಗಬಹುದು, ಇವನಿಗೆ ನಿತ್ಯಾತ್ಮಶುಕಯೋಗಿ ಎಂಬ ಬಿರುದುಂಟು ಎಂದು ಹೇಳುತ್ತಾರೆ.
ಇವನ ಗ್ರಂಥಗಳಲ್ಲಿ
1. ಭಾಗವತ
ಇದು ಭಾಮಿನೀಷಟ್ಟದಿಯಲ್ಲಿ ಬರೆದಿದೆ; ಸಂಧಿ 280, ಪದ್ಯ 12235, ಇದರಲ್ಲಿ
ಭಾಗವತದರ್ಧವನು ಸಂಗ್ರಹ | ವಾಗಿ ಬಲ್ಲಂದದಲಿ ವಿಷಯವಿ |
ಭಾಗವನು ತತ್ವಪ್ರಯೋಜನಜನಿತಸಿದ್ಧಿಯನು ||
ರಾಗದಿಂದಳಾಪುವೆನು.
ಎಂದು ಕವಿ ಹೇಳುತ್ತಾನೆ, ವರ್ಣನೀಯಾಂಶಗಳನ್ನು ಈ ಪದ್ಯದಲ್ಲಿ ಹೇಳಿದ್ದಾನೆ--
ಹರಿಗುಣಸ್ತುತಿ ಹರಿಪದಾಂಬುಜ | ಶರಣಜನಸಂಕೀರ್ತನಸ್ತುತಿ |
ಹರಿಪದಾನತಭಕ್ತಿ ತತ್ಸಾಧನದ ವಿಸ್ತಾರ ||
